Zion Tangko Hawm 3 Na
The Full Gospel to the Whole World
UPNA NEI MI IHCIHTE
- Amawhna a kisikkik mi hi ding hi...
- Thuman thutak ahi Jesu ahihna bangin a pom/asang mi hi ding hi...
- Jesu in Satan tungah thukhenna tawh gualzawhna lakkhin zo hi cih athei mi ahi hi…
- AD 33 hun pawl a, Pentecost Day ni in Khasiangtho hong kibua in Pawlpi hong ding hi cih upna neimi hi ding hi.
- Sawltakte upna, thuhilhna, zuihna, lametna banglian anei mi hi ding…
Editorial Laikung pan
Athumveina Zion Tangko hangin ih lungdamna Topa tungah ih ko hi.
Thukhung a bawl Pasian in na khempeuh ah zawi (lampi) khatciat na neisak hi.
Hauhna ding: 1/10 leh anpal tawh Topa thuman takin zah-tak hileng, leitung hauhna a ki ngah ding ahi hi.
Khansauna: Nu leh pa zahtak ding, nuntakna nei khempeuh tungah itna laksiam ding tua in leitung ih khansau sak hi.
Vangliatna: (1) Thunget a hat mah mah mite in vangliatna nei a, gupna a ngahkei zongin vang-lian thei hi. (2) A mihing nuntakna ah kikepsiamna tawh vangliatna anei zong omthei hi. (3) Jesu tawh kizom a vangliatna in thunget hat ding, kikemzo ding, thumaan ding, tua mite in vangliatna (power) neithei hi.
Gupna ngahna: Gupkhiatna ih ngah theihna dingin: (1) Hong gumpa in kua hi hiam? (2) A hunzui in hong bang ci gup? (3) gupngah leh ngahlo kilamdanna a om hiam? Hih thuthumte theih ma-sak ding hi a, theihna leh telna in gupna hi nailo hi. Jesu pen a kimutheilo Pasian khat bek, lei mimawhte tan dingin hong kumsuk in mimawhte aitang in si, kivui, thokik cih a um mi khempeuh in, ka mawhna in amah that hi, ka mawhna pan ka kisikkik hi, cih upna anei mite Jesu min tawh kituiphum ding ahi hi (Sawl.2:38-39). Piakkhong Khasiangtho ngahte kamtuam pau in, siangtho nuntakna ah Khasiangtho in a makaih bangin kalsuan ding hi. Upna kibang ih cihte pawlpi khat ahi hi (the body of Christ, invisible church) .
USA Tangthu Theihhuai Pawlkhat
America cih min: German mi Christopher Columbus in 1492-1502 kumsung in tulaitak South America gamlam hong zinkhia hi. Kum 7 khitciangin, a lawm hoih mahmah ahi Amerigo Vespucci (Eng. Americus Vesputius) in zong tulaitak America gam lam tembaw 4 tawh hong zin a, Asia tawh a kizom khalo gam lian mahmah om hi ci in New World cih min vawh hi. Hih New World cih min a vawh pen laigelh siam mahmah Martin Waldseemuller in news paper ah Vespucci min tapsak in America cih lai hong hawmkhia in 1499, 1502, 1507 kumte ah Europe gam sungah hih thu kizel khinta hi. America gam min pen Amerigo Vespucci (Eng. Americus Vesputius min pan ih ngah ahi hi kici thei hi.
USA cih min: The Great Britain khut nuai pan America gamke 13 te in 1765-1783 suahtakna dingin na do uh a “The American Revolution” kici hi. July 4th, 1776 ni in British khut nuai pan in suahtakna (Independence Day) ngah ni in kiciamteh hi. Gamke 13 kipawl khawm in a dokhawm ih hih ciang ci in, United Sates of America cih kammal hong gelhkhia masa taktak pen Thomas Jefferson hidingin kigen hi, representatives khem-peuh in zong thukim in, United States of America cih min kizang suak a, State 13 tawh kipan hi in, tu in State 50 bang kiphata hi. Street minte ah Jefferson cih min na muh sim in United States cih kammal hong zangkhia masa pen cih phawk huai hi.
September kha sungin thutuamtuam
Member khang: (1) September kha sungin ZPC member 26, inn nga khang hi. (2) New Darkhai UPC ah inn 6, member 42 kibeh- lap hi, Topan minthanna ngahta hen.
Zinmang nih: Rev. Cin Hau Pau, Active Kale II District Superintendent leh Rev. Tun Lian Kam, Kaptel Section leh Tuimang Section pastor ahingei, Kalay Revival Local Senior Pastor ahi ngei, hih siapi nihte Kawlgam pan ZPC pawlpi hong veh thei uh ahih man in, September kha sung zinmangpi nih ci in kiciamteh hi.
Inn thak nih: (1) Pa Deih Sangte in 9/5 ni in pawlpi bup kaikhawm in inn thak lopna hong neihpih uh hi. (2) Pa Nang Hau Khup ten zong inn leithak in 9/19 ni in inn lutna hong neithei uh a, pawlpi ciaptehna ah tukha sung inn tawh kisai thupha lian mahmah nih ih neih KHA ci in kiciamteh hi.
Department Day nih: Ih pawlpi tangthu sutna ah Mission Day 9/13, leh PLM Day 9/27 nipi thupi nih vei kibawl KHA (month) hi ci in kiciam- teh hi.
Dahna Lianpi: Nu Ne Nem apianna anu Pi Cing Do Niang in 9/19 ni in Australia pan in hong nusia in; Gang Thang ni, apa’ unu Nu Khan in Yangon pan ni 9/22 ni in hong nusia hi, Nu Cing Dim pianna pa Pu Am Khaw Thang in a tenna Zampi pan 9/27 ni in hong nusia a, Pawlpi in dahna lianpi thumvei ih tuah khak KHA in ih ciamteh hi. Topa’ Khasiangtho in a dah leh lunglengte -hong hehnepsak ta hen. Amen
“JESU THEIHTELNA AH NA KHANGTO SEMSEM UN” (2Pet.3:18)
Jesu min: Vantung mi in Mary leh Josef tungah naungek hongsuah ciangin amin Yehoshua na phuak ding uh hi, ama mipawlte mawhna pan gumkhia ding ahih man in ci hi (Mt.1:21). Yehoshua a khiatna in Yahweh in Gumpa ahi hi, cihna ahi hi. Yahweh (Jehovah) cih min mah hong kengsuk a hi hi. Mihingte thuman lohna hangin Babel pan in pau nam tampi Pasian piangsak hi. Tua pau khempeuh a khiatna Topa in thei hi. Tua pau nam khempeuh sung ah Pasian a hihna leh ama min a kilawhciat ding Topa gelkholhsa ahi hi.
Jesu zaa-min tuamtuamte:
1. Lamdang (Is.9:6): Leitung a piansak mapek in amah na omngei khinzo a, leitung in amah a theikei hi (Jn.1:10,11). A kimu theilo Pasian mihing taksa tawh hong piangin, mitawh hong omkhopna (Emmanuel Mt.1:23) in a lamdang penpen khat ahi hi.
2. Thulakpa (Isa.9:6): Amah leh amah hong kipholak tawm in, kua taktak hiam cih amahmah hong kigenkhia hi ”Keimah in Alfa leh Omega ka hi hi” kici a, laigelhpa John in tellua hinteh Vang-lian Topa Pasian na cibeh lai hi (Mang. 1:8,17,18,22,13).
3. Vanglian Pasian (Isa.9:6): Elohim a khiatna in Vanglian Pasian cihna ahi hi (the Almighty God). Tua hong suak nau-ngek “Jesu” pen Vang-lian Pasian na himawk hi, vantung miten Jesu van-tungah a kahtoh khit ciangin Tuuno phatna la hi bangin sa hi: “A tawntung in thupha, minthanna, vangliatna leh ukzawhna ngah ta hen,” ci uh hi. (Mang.5:12,13).
4. Tawntung Pa (Isa.9:6): Everlasting Father a kici khat bek om a, tua tangtawng Pasian mihing taksa in hong suak in a min Jesu ahi hi (Mt.1:21; 1Tim.3:16; Fil.2:6,7).
5. Kilemna Kumpi (Isa.9:6): A beisa, tulaitak leh mailam ah Kumpi khat bek hi a, tua in Jesu ahi hi (Zech.9:10; 14:9;Mt.21:5)
6. Gupna min (Mt.1:21; Sawl.4: 12):
Gupkhiatna ah Pasian min a kihel kisam hi, Pasian pen mihing bangin hong paina ah ama min taktak tawh hong paina hang hi a, mihingte tawh a kialmdannna zong ahi hi. Pasian pen a min tawh kipah-tawi in, amin tawh cina dam, nalam-dang piang, dawite ki hawlkhia, Ama min sungah gupna a koihna hang na hi gige a, a gupna deih in a min nial cih
bang a om thei ngeikei hi. Ahang pen tua Pasian khat a amin ahi “Jesu”, ih cih ciangin Vanglian Pasian ahihna a tangko ih hi hi.
7. Pa, Tapa, Khasiangtho amin in Jesu ahi hi (Mt.28:19; Sawl.2:38):
- Everlasting Father “Tawntung Pa” pen tapa bangin hongpai in amin Jesu ahi hi (Isa.9:6).
- Tua tapa a min Jesu na phuak ding uh hi (Mt.1:23).
Ananias leh Safira te nupa in Khasiangtho khem hi (Sawl.5:1-11), tua Khasiangtho pen Topa’ Khasiangtho kici hi (aneu 9), tua Khasiangtho khem a cih a min pen Jesu ahihna a Sawl.5:40-42 sungah na genbeh suk hi. Tua ban ah, Khasiangtho in Saul khuavak tawh kap tuk a, kua na hi hiam Adonai (Topa) aw, a cih leh “na hong bawlsiat Jesu ka hi hi” ci hi (9:3-5). Khasiangtho min in Jesu ahi hi.
Tua ahihman in Pa min, Tapa min, Khasiangtho min in Jesu hi cih sawltakte in Khasiangtho hong kibuaksuk Pentecost ni pan hong telta uh ahih man in Jesu min tawh tuiphum na hong zang uh a, Pasiam in hong kitelsak mahmah tuam hi.
Jesu in KEIMAH a kici Moses tungah a kilak den pa zong na hi gige hi (Jn.8:24; 1Kor.10:1-4; Pai.3:13-14).
Pasian khat bek om in, a min Jesu hi cih pen dawite nangawn in lau in ling deldel uh hi (James 2:19; Jude 1:4,24)
Gentail te pen Jesu min sungah hong kisamkhawm kik ahi hi (Sawl.15:16).
HOLIMNA
Khalam picing: Kha picing ih cihte pen a picing nailote a puksaklote ahi hi. Ama lawpna sangin midangte adingin a nungta siamte ahi hi.
Hun uksiamna: kikhop a nop theihna dingin hun makaih siam ding hi a, mimal thu tam genna in hun zatzia nuamsak zawlo hi.
Siamna: siamna ih cih in bang teng thu gen ding cih sangin, bang teng genlo ding cih kikepna pan in siamna hong piangzaw hi.
Pulpi ah kidop ding: Committee ah thu kikup nam dingte pulpi pan tangko hetloh ding ahi hi. Innkuan leh mimal tangthu namte mipi mai ah zatloh hoihzaw a, mipi kha an vaklo hi.
Mi hampha ih cihte: Mi khatpeuh itna, zahtakna, thupisimna leh neu muh kammal tawh holo in, a manpha pen nuntakna nei a hihlam phawkkawmsa in a hopih siamte mi hampha pente hizaw sop hi.
Telzaw le cin: Jesu tel semsem leng ih nuntakna a manphatna ki tel semsem a, ki khamuang sem sem in, lzongki lungdam semsem thei hi.
TUNAI THUTHANG
Global missions: UPCI General Conference 2015 nuam takin kizo a, Global mission in Thursday nitak in upna kamciam hong bawl uh a, $ 2,700,000.00 kingah in, kipia pia lai hi. Kum 7 sung missionary innkuan 18 bang kisawl khia zo ding cih thu Global Missions Director Bruce Howell, Vice General Superintedent Paul Mooney te in genkhia uh hi. 212 Nations ah UPCI Global in Mission in na kisem in, 2014-2015 kum sungin gam thak 9 kua ah gupna thu kitangko in, pawlpi hong dingthei hi.
Pope Francis leh Obama: Tulaitak pope ahi Francis in Vatican pan in US White House leh Congress ah zong vahawh thei in, a gen bulpi pen in: “ih vek in gambel mite ih hi a, gambel mite etsiam ciat ni, tua dingin US kong muang mahmah a, kong kisathei mahmah hi, ci hi. US government tawh kop khawm in, leitung ah mi cimawhte a dingin pangkhwm ni”, ci hi. US ah teng native American a kicite zong tuma khangthum masiah a tamzaw gambel mah na hi uh hi, gambel mite etsiam un ci hi.
Joint Meeting: Nashville, Tulsa, Indianapolis, pan upna kibang ahithei zah in holim khopna limci kineithei in, khalam itna thak hong kia hi.
KHANTOHNA
Innkuan: US gam ah tengin ih khuasak theihna dingin computer, email, mobile zat theih kisam hi. Vantung gam khualzitna ah innkuan in upna kibang sungah nuamsa khawm in, kikhopna, biakpiakna, piakkhiatna, phatna te ah kipumkhatna in innkuan thanem sak theilo te ahi hi.
Khangnote: US pilna sin, US anlimte ne in, US nopsakna a ciamkha khangno mi khempeuh in ka nu leh pa in hong hanciampihna tawh hiciang a tung ka hi hi, cih a phawktawntungte pen a khantohna kiciangtan nailo cihna hi a, ih nu leh pate kum 65 a cinkhit ciangin inn bill te amau tavuan puasak nawn kei leng, mipil hong kici ta ding hi. Pawlpi upa, siate tawh a ton-khawm thei khangno khat pen khalam ah a khangtoto ding mi khat ahi hi.
Itna tawh nungta: Nu itna, pa itna, nupa ki itna leh tate itna maan tawh a nungta mi khat nuntakna kuamah in a thanem sak zo ngeikei hi. Tua bang mite nuntakna ah Agape itna tawh hong it den Jesu in amaute Pasian ahi hi.
Lamtawp dongin: Lamtawp vantung ih tunciang in Jesu khe ah ih bok ding, kumpite Kumpi ahi Jesu a min minthang semsem ta hen. Amen.
Website:
www.zomipentecostaltv.com
By Pa Thawn Tuang
About the Author
0 Comments